вторник, 10 января 2017 г.

Երբ կողքիս վստահելի տղամարդ է ես ինձ շատ պաշտպանված և հանգիստ եմ զգում

« Երջանիկ է նա, ով նախօրեին կատարած աշխատանքում տեսնում է իր կամքի դրսևորման հետքերը»                                                                                  
ԱԼԵՆ

Մեր զրուցակիցն է  « Բազմազավակ մայրերի աջակցության միավորում» ՀԿ -ի նախագահ, իրավաբան և  բանասեր, բազմազավակ մայր և պարզապես հրաշալի մարդ ու յուրօրինակ անհատականություն՝   Մարգարիտա Հովսեփյանը:



1. Ո՞վ է Մարգարիտա Հովսեփյանը որպես մայր և որպես տատիկ:


Որպես մայր և տատիկ  ինձ այնքան էլ չեմ հավանում, քանի որ շատ քիչ ժամանակ եմ ունենում երեխաներիս հետ շփվելու համար: Ուստի, օրվա այն  քիչ հատվածը, որը  ինձ կապում է  երեխաներիս հետ, աշխատում եմ լցնել սիրով և ջերմությամբ: Շատ եմ ուզում, որպեսզի   որդիներս  լինեն՝  գիտակից, ինտելեկտով բարձր, բարի, պարկեշտ, նպատակասլաց, և ամենակարևորը՝ պիտանի մարդիկ մեր երկրի համար: Թե որքանով ինձ կհաջողվի իրենց մեջ սերմանել նշված կարևոր հատկությունները, ժամանակը ցույց կտա:

2. Ժամանակակից քաղաքականությունը իրենից ներկայացնում է ոչ թե պայքար մարդկանց, այլ հասարակության մեջ: Ինչպե՞ս եք Դուք Ձեզ տեսնում այդ պայքարում:


Ես անձամբ շատ եմ հավատում արդարությանն ու ճշմարտությանը, ըստ իս ՝ դրանք են բարձրագույն  բարոյական նորմերը:  Միշտ պայքարել եմ, պայքարում եմ և պայքարելու եմ հանուն արդարության և ճշմարտության: Հայ ազգը պատկանում է աշխարհի հնագույն քաղաքակիրթ ժողովուրդների շարքին, սակայն այսօր իմ ժողովուրդը ապրում է ոչ այնքան արժանապատիվ կյանքով: Ես պայքարում եմ մեր երկրում կարգուկանոն հաստատելու համար, պայքարում եմ  կիրթ, օրինակելի, քաջ, բարձր բարոյական գիտակցություն  ունեցող  հասարակություն ձևավորելու  համար:


3. Որևէ հիշարժան դեպք կարո՞ղ եք պատմել ամուսնացած տարիներից: Կարծում եմ ամեն դեպքում սիրելով եք ամուսնացել: Ո՞ր քայլից հետո հասկացաք,  որ սիրում եք տղամարդուն:


Շատ կարճ կպատասխանեմ Ձեր հարցին՝ տղամարդուն սիրում եմ միայն այն դեպքում, երբ վստահում եմ,  իսկ հիասթափվում, երբ նա  կորցնում է վստահությունս:
Ամենահիշարժանը ամուսնացած տարիներից՝ որդիներիս  ծնունդներն են:


4. Երկու հզոր ծառ դժվարությամբ են աճում իրար կողքի: Դուք ուժեղ կին եք:  Ձեր կողքին արդյո՞ք կդիմանար ուժեղ տղամարդը:


Նայած, թե ուժեղ ասելով ի՞նչ ենք հասկանում: Ինձ հետ և շատ հեշտ է , և շատ դժվար:  Ես  տղամարդուց ողջ կյանքում պահանջել եմ ընդամենը մեկ, բայցևայնպես, շատ կարևոր մոտեցում՝ վստահություն: Երբ կողքիս վստահելի տղամարդ է, ես ինձ շատ պաշտպանված և հանգիստ  եմ զգում: Իսկ երբ կողակիցս կորցնում է  վստահությունս,  ապա բացի դատարկությունից ուրիշ ոչինչ չեմ զգում: 


5. Ինչպե՞ ս  ծնվեց  « Բազմազավակ մայրերի աջակցության միավորում » հասարակական կազմակերպության  հիմնադրման գաղափարը:


Տարիներ առաջ՝ մի անհաջող գործարքի ժամանակ, ինձ շատ լուրջ նյութական  հարված  հասցրեցին գործընկերներս: Իհարկե, իրավաբանի մասնագիտությունը ինձ շատ օգնեց, չնայած նրան, որ մինչ օրս դեռ ամբողջությամբ չեմ կարողացել ազատվել այդ հսկայական վնասից: Սակայն, բարոյական վնասը ավելի մեծ էր ու  մտածեցի, եթե  չլինեի իրավաբան, ապա ինչպես կկարողանայի պաշտպանվել և ինչպես են պաշտպանվում այն բազմազավակ ընտանիքների կանայք և տղամարդիկ, ովքեր  չունեն բավականաչափ փորձ, գիտելիք, համառություն և համարձակություն… Այդ ժամանակ  ծնվեց բազմազավակների պաշտպանությամբ  զբաղվելու գաղափարը: 2011 թվականի մայիս ամսին  հիմնեցի « Բազմազավակ մայրերի աջակցության միավորում» հասարակական կազմակերպությունը և շատ մեծ դժվարությամբ, սակայն ինձ բնորոշ համառությամբ և համբերությամբ ծավալեցի  բազմազավակներին  աջակցելու գործունեությունը:


6. Առաջիկայում ի՞նչ նոր ծրագրեր ունեք թե՛ քաղաքականության հետ կապված, և թե՛ Ձեր կազմակերպության: Կարո՞ղ եք նշել ծրագրերի իրականացման ժամկետներ:


Քաղաքականության հետ կապված կարծում եմ՝ ամենակարևոր իրադարձությունը  ապրիլ ամսին կայանալիք ազգային ժողովի ընտրություններն են, որում <Ալյանս> կուսակցությունը նույնպես  ոնենալու է մասնակցություն:
Իսկ մեր կազմակերպության հետ կապված ուզում եմ նշել մի հրաշալի նոր ծրագրի մասին: Մենք կազմակերպելու ենք «Այրարատ » խորագրով՝ հայկական ավանդության  բարեգործական միջազգային ցուցահանդես-վաճառք, որի հասույթը ուղղելու ենք բազմազավակ ընտանիքների կեցության բարելավման, սոցիալական խնդիրների կարգավորմանը:

Եվ  վերջում, բլից հարցում , ակնկալում ենք լսել Ձեր անկեղծ պատասխանները.


1.Բնութագրեք Ձեզ մեկ բառով:

Կներեք, բայց երկու բառ է՝  շատ  նպատակասլաց:

2.Ի՞նչ է Ձեզ համար հավատքը:

Կյանքի իմաստ:

3.Գիրք, որը պարտադիր պետք է կարդալ:

Աստվածաշունչ, «Տիգրան Մեծ», հեղինակ Հայկ Խաչատրյան:

4. Ո՞ր գույնի պակասն եք հաճախ զգում Ձեր  ներկապնակում:

Վարդագույն:

5.      Արարք, որի համար հաճախ ափսոսումեք:

Երբեք , որևէ բանի համար չեմ ափսոսում:


Շնորհակալություն հարցազրույցի համար, ցանկանում ենք Ձեզ ստեղծագործական և աշխատանքային վերելքներ ու բազում  հաջողություններ:


Ձեզ նույնպես շնորհակալություն:


Հարցազրույցը վարեց՝ Արամ Խաչատրյանը/ ԱՐԽԱ